更換手表電池的奇遇

上星期亞煩將已停止運作多日嘅手表拎去附近店舖換電池，因早前經過該店睇見舖前貼著【換電池$ 11 元起】見價錢相宜走去試試。點解要試一試？有啲舖用嘅電池質量會差啲，同埋一個自私嘅念頭：“個個唔幫襯附近舖，啲舖無生意就摺埋，最唔方便嗰個咪喺自己囉。”

企喺舖面前睇緊喺咪營業中，喥門被向內拉開咗，一個年約三十歲嘅男子出現眼前向亞煩問：「有咩嘢要呀？入嚟睇吓啦。」亞煩即時表態：「換手表電池。」，此時舖內一名年齡約五十過外女士和男子齊聲：「哦！換電池，入嚟啦！」

店舖男子接過亞煩嘅手表走進櫃台後取出工具盒之時

店舖女：「你條表帶戴到咁，得閒就換咗佢啦，我地有好多靚表帶可以同你換。」

亞煩：「哦！唔使喇。」腦海裡浮出心底話：“我條表帶搵咗好耐先搵到條咁啱心水嘅嚟換﹙薄身鱷魚皮紋﹚，換咗半年咋，仲唔係日日戴、要換？”

亞煩對眼一直望住自己隻手表正被男子施行開蓋，睇見店舖男嘅手勢，心忖“好似咁難開嘅，似唔多熟手喎。”

店舖女：「換電池可以用優惠價認購其他嘢，你睇吓，全部都係廸……嘅正版貨嚟，好靚架。」

唔知喺幾時店舖女已經手拎住個銀閃而精細嘅槌仔，以溫柔嘅口吻對店舖男講：「睇住你隻手呀！」，再重複一次後以適度輕巧力度“叮‧叮”兩下槌喺店舖男手中類似小型指甲挫嘅工具上方，兩人合作將表蓋打開咗。

店舖女一邊放好銀槌一邊問亞煩：「你隻表第一次換電呀？」「唔怪得咁緊啦。」

亞煩見表蓋打開咗，望到用邊隻電就應該報價啦，即問：「粒電要幾多錢呀？」

店舖男從身後嘅排架膠盒攞咗粒電池答：「 $ 4 0 」

亞煩：「嘩！四十蚊咁貴！我唔換喇。」心忖：“早前我屋企人去街市嗰間換過收 $20。”

店舖女：「我地啲電池原裝日本貨嚟架，你睇吓。」

亞煩：「街市嗰間換都係廿蚊咋，我見你地貼咗 $ 11 先至嚟。」

店舖女：「你嫌貴，不如你認購其他嘢，咪送粒電俾你囉！」

此時店舖男停咗手幫口：「係啊！」

亞煩腦海即時反應：“吓！買其他嘢送一粒 $ 40電池？買咩嘢？我嚟換手表電池。”“而家啲人興認購？聽到有嘢送就會買？”

亞煩：「我唔換喇！早前我喺中環度換都係 $ 15，喺街市嗰間換過都係收 $20。」

見亞煩咁堅拒，店舖女：「算啦！都開咗粒電咯﹙其實仲未開封﹚，就收你 $ 2 0，換咗佢啦！好唔好？」「嗰粒係原裝電嚟架。」

亞煩：「咁…好啦。」「我喺中環度換都係日本原裝電嚟架。」

店舖男立刻撕開電池包裝，將電池放入然後將表蓋「咔」一聲冚好。

此時亞煩已經左手拎住廿蚊、右手伸出想接番隻手表；店舖男邊望牆上掛鐘將時間調整邊對亞煩講：「幫你較好，睇睇先啦！」

最終亞煩以廿蚊完成換手表電池步出店鋪，舖內兩人同聲：「得閒再嚟睇過啦。」

一路行返屋企一路諗：“佢哋係好好招呼，但係咁樣嘅營業方式會有幾多生意呢？”“顧客原本係去換電池變咗購買其他貨品送電池，思想邏輯有無問題呢？”

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

過往我啲手表電池都係幫襯中環街市﹙斜路上面﹚嗰個鐘表維修檔口，由於佢收費相宜，﹙嗰陣喺附近返工﹚亞煩每有換電、維修都第一時間攞去佢度。

一次，大家姐隻有紀念價值嘅舊款「X 陀」手表壞咗，托亞煩拎去維修中心，好似係維修營業時間嘅問題，亞煩就拎咗去表檔。當日師傅開咗後睇咗，就話要換零件，由於零件要去維修中心買，需要三、幾日時間，費用大概要 $ 3 5 0 左右。有友人就講咗句提醒嘅說話：“ 靚嘅表唔好拎去表檔維修，因住會俾人換咗啲零件。”

一星期後，亞煩準備咗五百大元同單據去攞番隻表，師傅拎出隻表搖咗幾下、較好時間同日曆遞俾亞煩睇一睇、收貨，隨即報收 $ 2 8 0。隻手表到咗而家仲仍然運作良好。

另一次，阿妹幫老公拎手表去維修，嗰度話隻表壞咗要 $ 3 0 0 維修費，阿妹諗住隻表唔係貴不過係紀念品、決定唔修。有日同亞煩講起，問咗妹夫嘅維修費上限就攞去師傅度睇吓。師傅開咗表蓋，滴油用布仔細咁內外抺淨，換咗電較番時間﹙過程足足用咗成十分鐘﹚，然後話：「三十蚊。」。阿妹同妹夫當然係最開心嗰個啦。嗰陣亞煩就包攬咗家人嘅手表換電維修服務。

博友回應與回覆：

菊主  2012年8月2日上午11:48

煩煩 : 早安!

昨夜看過,太睏,無留言.一邊看,一邊想,莫非是你被黑店劏的奇遇 ? 

最後才知無驚無險. 店主不太老實.

又,菊主鮮戴表, 名副其實的' 兩袖清風 ' . (laughing)

顯示全部回覆 共3則

麻煩  2012年8月2日下午1:12

菊主：午安！

情景真係有啲黑店感覺，不過佢哋服務好好噃！好多檔口都收三、四十蚊架，不過亞煩有固定心水檔啫。阿妹話我個樣 (hypnotized) 引致有咁嘅奇遇喎。(rolling on the floor)

手表係亞煩嘅心頭好，係好鍾意齋睇唔一定買嗰隻。..

菊主

2012年8月3日上午9:36

煩煩樣子像傻氣的水魚!(laughing)

麻煩

2012年8月3日下午12:15

正正係阿妹嗰句。(rolling on the floor)

蘭花DNA

2012年8月1日下午4:32

你真係好記性, 咁多次維修手表, 都仲歷歷在目, 印像深刻.....................(tongue)

我換手表電池, 都要好幾拾蚊, 以前有接觸呢行, 其實電池好鬼平, 幾蚊粒咋...........(surprise)

麻煩

2012年8月1日下午4:55

哈哈！最近我托舊同事拎咗隻表去換表扣，因為換唔到表帶，佢好好心機拆咗另一條表帶扣同我換咗，連電池 $15， 一共收咗 $45 。(laughing)

你話我點會唔記住佢咁用心嘅服務 (big hug)。