中秋夜歡叙後回家，下了車轉乘專線小巴，時近午夜，歸家人潮從四方八面湧向各路線小巴站，由於車站沒有車輛，阿煩前面已出現排隊隊伍，遂急步跟上。
等候期間眼看晴空的超級月亮，拿著手機來一張月當頭合照 “嚓” 正低頭看合照…嘩！有感相中人如 “哈囉喂” 之際，耳邊一把青年聲音「可唔可以俾我同你一齊排呀？唔該你。」
一語驚醒我的月夢，橫眼看身旁站著一個個子高佻的小男生，「吓！同我一齊排？點解呀？」「唔該你吖！我應承咗阿媽要早啲返屋企。」邊說邊合手請求；我心暗忖 “你搞咩呀？幾時企喺我側邊架…”正猶疑之際，小子急忙補上一句「我排你後面吖！」回頭看，長長的人龍「唔得喎！我後面有人喎！」小男生臉有難色仍繼續請求「唔該你吖！」阿煩在對話中感覺這男生帶點稚氣遂對他說：「你企我前面啦！」
同時間阿煩心裡嘀咕 “我又唔係排頭位，前面有廿幾三十人，點解搵我，點趕都要搭第二部車啦…” 此時前方的另一路線小巴到站﹙該條路線所經地點與這條路線有部份相同，由於車數較少、車站較前，故多數乘客不作首選﹚，小男生眼見前車站乘客不多，回頭對我說：「我搭嗰架。」「快啲去！」小子快步跑上去，阿煩一邊讚賞 “小子都算有交帶” 一邊留意前面車站，看見上車的人數不多該尚餘座位，也跑上去。
車上小男生不停地張望，看見他焦急的神態，我想起了「灰姑娘」的故事，只是主角換了個小男生。
車廂內我仍然在想 “這小子點解選中我…佢俾隊伍前面的人拒絕？我嗰樣都唔見得友善啫…同我一齊排…插隊企我後面就要問後面嗰個啦！唔通佢係同住一棟樓…抑或……” 阿煩到站下車，回望小男生坐在座位上依然心焦張望。
